Taimi Haihambo

ONGWEDIVA - Ovakwashiwana vaAngola Ve lihanena omatala aShikango moshitukulwa shaHangwena otava tI ova dja koshilongo shavo nelalakano okukonga ouxupilo moNamibia, ashike vamwe eshi ve ya omu, ove litwa vali moixuna yamemememe.

Ovaangola ovo have ende ve li moungudu ove lihenana mOshikango, unene pomatala.

Ava otava hokolola kutya ova tauka ko koshilongo shavo omolwoluhepo loidjalomwa, oikulya osho yoo eemhumbwe dimwe da keshe fiku. Ashike eshi ve ya moNamibia omashongo inaa xwepopala shaashi kave wete oilonga oyo ye va taula koshilongo shavo.

Vahapu paife ohava nangala koshi yomiti manga va teelela ou a hala oumunhu woilonga e va kufe po, ashike ovayandji voilonga ova pumba. Francisco Antonio, umwe womwaava va pumbwa oilonga okwa ti kutya vahapu vomuvo ova kala po lela pomatala aShikango omo vamwe nokuli va ninga po eemwedi ndele inava mona oilonga natango.

Ovakwashiwana vaAngola ova popya yoo kutya koshi yomiti oku hava nangala ohava monene ko oixuna keemwe, outalala oshoyo kookalyamupombo. Ova hokolola yoo kutya fimbo limwe ohava ningi omaindilo va pewe omilele momatala nande oposhivelo shomatala opo ve wete pe na eameno, ashike ovafilishisho vomatala ihave shi pitike.

Ovaangola ava natango otava nane noudjuu ngee tashi ya pokulifila oshisho komalutu, shaashi keve na naana apa tava dulu oku likoshela. Ohava di ashike pehalandjadja, olo li li unene pomukunghulo wondjila apa hapa ende ovanhu efimbo keshe.

Ova weda po yoo kutya ngee tashi ya pokulya ohava kala va tela ashike ovanhu mokutumba oinima yavo opo va dule okumona po nande odola yokulada okakuki.

Ovakainhu vati luhapu ohava i momatala va ka kwanghule eenghundu voo tava pewa okafilinga.

Nongeenge fiku olo inava mona ou e na oinima tai tumbwa, oufila tau tuwa ile oikuni tai pandaulwa nena kave na apa tava hange oshimaliwa shokulya.

Ova weda po yoo kutya natango ove na oumbada woku ka longa peenhele dimwe shaashi ngee nee omunhu a ninga elao a mona oilonga, ovayandji voilonga vamwe ihava ka futa oimaliwa ei va udeneka. Eshi ohashi etifa nee omunhu a shune keumbo koAngola, ye a ka aluke vali a konge oilonga imwe nonande ohai monika noudjuu. Nangula Haimbodi oo e li umwe naye womovakongi voilonga ei, okwa ti kutya ovanhu vamwe ohava ile ovanhu pomatala nelalakano loku va longela omunyonena. Okwa kunghilila vakwao ava hava kalele omiti edi, tava kongo oilonga va kale va kotokela ookalyamupombo voludi eli.

“Ohatu indile Ovanamibia ava va pumbwa ovanhu voku va longela ve uye pomatala aShikango,” umwe ta tumbula.